અલક મલકની વાતો

તુફાન શું છે એનો અનુભવ કરી તો જો,
કાંઠે ઊભો છે શું? અરે સાગર તરી તો જો.

પ્રત્યેક પળ મરણ ની તરફ લઈને જાય છે,
તારા જીવનની સામે અરીસો ધરી તો જો.

જીવન સફળ જીવનનું રૂડું સ્મારક થઈ જશે,
દિલ પર ખુદાનું નામ જરા કોતરી તો જો.

એની કૃપાઓ જોઈનેજ સ્તબ્ધ થઈ જઈશ,
વરસાદના ટીપાંની ગણતરી કરીતો જો.

ફૂલો તો બાગમાંથી બધા લઈને જાય છે,
ક્યારેક કંટકોથી એ પાલવ ભરી તો જો.

ખાબોચિયામાં ક્યાં સુધી ગુંગળાઈને રહીશ,
કેવું વિશાળ વિશ્વ છે તું વિસ્તરી તો જો.

ઘડતર જીવનનું થાય છે સંકટ સહ્યા પછી,
સંકટ જિંદગીમાં કદી નોતરી તો જો...